Kjo manekinë e cila përpiqet të paraqesë një imazh të përafërt të Heroit të Popullit, Çerçiz Topulli, e ekspozuar në Muzeun e Kalasë së Gjirokastrës, ka ngjallur reagime të shumta në rrjetet sociale duke i bërë thirrje Ministrisë së Kulturës të reagojë.
Personazhe të njohur dhe qytetarë të shumtë, kërkojnë nga dikasteri i drejtuar nga Blendi Gonxhe që të ndërhyjë dhe të largojë manekinin nga Muzeu, sepse sipas tyre po shëmton figurën e një heroi si Çerçizi.
“Hiqeni këtë dordolec” apelon profesori dhe gazetari i njohur Mentor Kikia, duke theksuar se autorët janë përpjekur të krijojnë një imazh të përafërt të heroit, por në fakt ka rezultuar me krijimin e një personazhi qesharak që mban veshjen, dylbitë dhe pushkën e heroit.
“Në vend të këtij dordoleci, mund të ishin mjaftuar edhe thjesht me një trup, pa kokë, pasi qëllimi ka qenë ekspozimi i veshjeve dhe armëve, dhe jo ndërtimi i një shtatoreje të heroit”, vijon Mentor Kikia.
Çerçiz Topulli ishte atdhetar dhe veprimtar i shquar i Rilindjes Kombëtare, udhëheqës i luftës së armatosur të çetave për çlirimin kombëtar të vendit, Hero i Popullit. Lindi në Gjirokastër, në vitin 1880 dhe u vra më 15 korrik 1915 në Fushën e Shtoit, në Shkodër, nga forcat e pushtuesve malazeze.
“Tallje me Heroin Kombëtar Çerçiz Topulli, një tallje që nuk është parë asnjëherë. Ja bënë Skënderbeut të madh, ja bënë Adem Jasharit, tani Çerçiz Topullit”, thuhet në një tjetër reagim ku qytetarët gjirokastritë bëjnë përgjegjëse bashkinë.
