Prokuroria e Specializuar në Hagë ka kërkuar dënim me gjashtë vjet burgim për ish-presidentin e Kosovës, Hashim Thaçi, në çështjen gjyqësore ku ai dhe katër persona të tjerë akuzohen për vepra që lidhen me pretendime për pengim të administrimit të drejtësisë.
Kërkesa është paraqitur gjatë deklarimeve përmbyllëse që po zhvillohen në Dhomat e Specializuara. Për Isni Kilajn, Bashkim Smakajn, Fadil Fazliun dhe Hajredin Kuçin, Prokuroria ka kërkuar nga tre vjet burgim.
Deklarimet përmbyllëse përbëjnë një nga fazat e fundit të këtij procesi gjyqësor. Ato janë paraparë të vazhdojnë edhe të premten dhe të hënën, kur palët do të kenë mundësinë të paraqesin argumentet e tyre përfundimtare para trupit gjykues.
Sipas pretendimeve të Prokurorisë, Thaçi, gjatë periudhës nga 12 prilli 2023 deri më 2 nëntor 2024 dhe gjatë vizitave që ka zhvilluar në paraburgim, u ka dhënë informacione konfidenciale lidhur me dëshmitarë të Zyrës së Prokurorit të Specializuar personave të përmendur në aktakuzë.
Prokuroria pretendon më tej se Thaçi kishte bashkërenduar tri grupe të veçanta, të lidhura me Bashkim Smakajn, Fadil Fazliun dhe Isni Kilajn, si dhe persona të tjerë ndaj të cilëve nuk janë ngritur akuza. Në pretendimet e aktakuzës përmendet gjithashtu edhe Hajredin Kuçi.
Sipas akuzës, synimi i pretenduar i këtyre veprimeve ishte ndikimi në dëshmitë e dëshmitarëve të ZPS-së në kuadër të procesit tjetër gjyqësor “Thaçi dhe të tjerët”.
Përveç ish-presidentit Thaçi, në këtë çështje akuzohen Bashkim Smakaj, Fadil Fazliu, Isni Kilaj dhe Hajredin Kuçi për vepra që lidhen me pretendime për përpjekje për pengimin e personave zyrtarë në kryerjen e detyrave të tyre.
Të pestë të akuzuarit i kanë kundërshtuar akuzat dhe janë deklaruar të pafajshëm. Mbrojtja pritet të paraqesë argumentet e saj përfundimtare dhe qëndrimin ndaj pretendimeve dhe kërkesave të Prokurorisë.
Kërkesa e Prokurorisë për gjashtë vjet burgim ndaj Thaçit dhe nga tre vjet për të akuzuarit e tjerë nuk përbën vendim të Gjykatës. Vendimi për fajësinë ose pafajësinë, si dhe për ndonjë dënim eventual, i takon trupit gjykues pas përfundimit të procedurës dhe shqyrtimit të argumenteve dhe provave të paraqitura nga palët.
