Njoftim i rëndësishëm për të gjithë udhëtarët që hyjnë në Kosovë, Dogana tregon kufirin që duhet ta dini
Dogana e Kosovës ka rikujtuar qytetarët dhe udhëtarët që hyjnë në Republikën e Kosovës përmes Aeroportit Ndërkombëtar të Prishtinës për rregullat që duhet të respektojnë gjatë kalimit nëpër procedurat doganore.
Në njoftimin e saj, Dogana ka vënë theks të veçantë te deklarimi i saktë i mallrave që udhëtarët sjellin me vete, duke rikujtuar se edhe personat që zgjedhin kanalin e gjelbër mund t’i nënshtrohen kontrollit.
Puna e përditshme e zyrtarëve doganorë në Aeroportin Ndërkombëtar të Prishtinës përfshin informimin e udhëtarëve, kontrollimin e bagazheve dhe zbatimin e procedurave përkatëse doganore.
Qëllimi i këtyre kontrolleve është parandalimi i shkeljeve të mundshme dhe sigurimi që mallrat që hyjnë në territorin e Kosovës të trajtohen në përputhje me rregullat në fuqi.
Dogana ka sqaruar se kalimi përmes kanalit të gjelbër nënkupton se udhëtari deklaron se nuk posedon mallra që duhet t’i paraqiten Doganës. Megjithatë, zgjedhja e këtij kanali nuk nënkupton se udhëtari përjashtohet nga mundësia e kontrollit.
Zyrtarët doganorë mund të kontrollojnë bagazhet edhe të udhëtarëve që kalojnë nëpër kanalin e gjelbër. Gjatë këtyre kontrolleve përdoren edhe pajisje skanuese, të cilat ndihmojnë në identifikimin e mallrave që mund t’i nënshtrohen deklarimit dhe procedurave të tjera.
Një nga informacionet kryesore të rikujtuara nga Dogana lidhet me vlerën e mallrave për nevoja personale që mund të futen në Kosovë përmes trafikut ajror.
Sipas Doganës së Kosovës, kufiri i patatueshëm për mallrat e destinuara për nevoja personale është 430 euro për udhëtar.
Nëse vlera e mallrave që një person sjell me vete tejkalon kufirin prej 430 eurosh, udhëtari duhet t’i deklarojë ato duke kaluar përmes kanalit të kuq.
Pas deklarimit, zyrtari doganor e informon udhëtarin për procedurat që duhet të ndiqen dhe për detyrimet doganore që mund të lindin në varësi të mallrave dhe vlerës së tyre.
Dogana u ka bërë thirrje udhëtarëve që të informohen dhe t’i deklarojnë saktë mallrat që kanë me vete, në mënyrë që të shmangin probleme gjatë kontrollit dhe procedurave doganore në Aeroportin Ndërkombëtar të Prishtinës.
