Presidenti turk, Recep Tayyip Erdogan, e përshkroi periudhën aktuale si fillimin e një epoke të re për Turqinë, duke e lidhur këtë vizion me zhvillimet në Siri, Irak dhe Lindjen e Mesme.
Gjatë një fjalimi në provincën juglindore të Bitlisit, ku mori pjesë në aktivitetet që shënuan 955-vjetorin e Betejës së Manzikertit, Erdogan foli para ushtarëve të veshur me uniforma selxhukase dhe përshkroi vizionin e tij për një Turqi më të fortë.
Sipas tij, Siria, Iraku dhe rajoni më i gjerë mund të hyjnë në një periudhë paqeje dhe stabiliteti pas viteve të tëra konflikti.
“Siria dhe Iraku, si dhe rajoni ynë më i gjerë, do të fitojnë klimën e paqes dhe stabilitetit që kanë kërkuar prej vitesh”, tha Erdogan, duke përmendur gjithashtu bashkëpunimin midis turqve, kurdëve dhe arabëve.
Por fjalimi i tij kishte edhe një komponent të fortë politik. Erdogan kundërshtoi ata që, tha ai, po përpiqen të pengojnë rrugën dhe bashkëpunimin e Turqisë në rajon.
“E dimë kush është i shqetësuar për këtë. E dimë kush është i shqetësuar. Atyre u them: çfarëdo që të bëni, nuk mund të na devijoni nga rruga jonë”, tha presidenti turk.
Në fjalën e tij, Erdogan foli edhe për planet që, sipas tij, po zhvillohen në rajon dhe përpjekjet që mund të dëmtojnë Turqinë dhe stabilitetin e Lindjes së Mesme.
Ai përdori tone të ashpra kundër atyre që i përshkroi si “tregtarë gjaku”, njerëz që përfitojnë nga terrorizmi dhe aktorë që kërkojnë ta mbajnë rajonin në pasiguri.
Edhe pse ai nuk e përmendi drejtpërdrejt Izraelin në këtë pjesë të fjalimit të tij, kritikat e tij vijnë në një kohë tensionesh të forta midis Ankarasë dhe Tel Avivit lidhur me zhvillimet në Lindjen e Mesme dhe veçanërisht situatën në Siri dhe Gaza.
Në fund, Erdogani u rikthye te vizioni i tij për Turqinë, duke e lidhur atë me atë që ai e quan “Shekulli i Turqisë”.
“Fituesi do të jetë populli turk, me 86 milionë qytetarët e tij. Epoka e një Turqie të madhe dhe të fuqishme ka filluar. Shekulli i Turqisë ka filluar”, tha ai, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
