Kreu i Prokurorisë së Posaçme, Klodian Braho ka qenë këtë të premte në Komisionin e Ligjeve, ku ka sqaruar edhe një herë e mirë raportin e institucionit që drejton me Policinë e Shtetit.
Në një kohë kur flitet për një ulje të besueshmërisë së Policisë së Shtetit nga SPAK dhe për perceptimin se aksionet po realizohen kryesisht nga prokurorët e posaçëm dhe oficerët e BKH-së, Braho ka theksuar se bashkëpunimi mes institucioneve mbetet i mirë dhe funksional.
Ai ka vlerësuar punën e shumicës dërrmuese të punonjësve të Policisë së Shtetit, duke theksuar se ky institucion mbetet një partner i pazëvendësueshëm në luftën kundër krimit dhe korrupsionit.
“Gjatë 2025, referimet penale të Policisë së Shtetit janë rritur në SPAK. Edhe gjatë këtij viti kemi pasur referime nga Policia e Shtetit. Kemi vlerësimin më të madh për Policinë e Shtetit, për shumicën e gjithë atyre njerëzve që punojnë në atë institucion.
Si në çdo institucion tjetër, jo të gjithë janë njësoj dhe ndonjëri prej tyre mund të ketë probleme me ligjin ose ne dyshojmë që mund të ketë. Policia e Shtetit është partneri ynë i pazëvendësueshëm, nuk e zëvendësojmë dot. Dhe suksesi ynë është i lidhur. Unë dhe struktura që drejtoj presim më shumë nga Policia. Veprimet që mund të kryejë BKH edhe për arrestimet e kontrollet në vende të caktuara janë veprime proceduriale. SPAK duhet të ketë një pavarësi institucionale, s’mund të varet gjithmonë nga institucionet e tjera. Ne s’mund ta zëvendësojmë Policinë, por duhet të kemi pavarësinë tonë, që struktura jonë të jetë e aftë të bëjë të gjithë ciklin”, tha Braho, ndërkohë që në vijim të raportimit kreu i SPAK është ndalur edhe tek çështja e pasurive të sekuestruara.
Sipas tij, asetet që burojnë nga veprimtari kriminale janë rrezik për ekonominë, duke paralajmëruar se deri në fund të vitit pritet të ketë edhe raste të tjera sekuestrimesh.
“Është e vërtetë që kemi pasur disa raste sekuestrimi pasurish që burojnë nga veprat penale. Këto pasuri janë si tumor në ekonomi dhe nuk ka asnjë zgjidhje tjetër veçse të sekuestrohen dhe konfiskohen. Ky produkt fuqizon grupet kriminale dhe çon deri në korrupsion në administratë. Më pas për persona të tretë si kontraktorë apo nënkontraktorë, e kam theksuar se janë interesa të ligjshme që SPAK do t’i mbrojë. Është një sfidë e madhe për shkak të numrit të madh të pasurive dhe shifrave të mëdha, por deri më tani ia kemi dalë. Nga pikëpamja ligjore nuk shohim të ketë problematika. Do të ketë edhe sekuestrime të tjera, jemi ende në korrik dhe deri në dhjetor do të ketë edhe çështje të tjera. Interesat e ligjshme janë nën mbrojtjen tonë”, tha Braho, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
