Ekzekutimi, larje hesapesh mes grupeve kriminale
97 plumba qëlluan autorët për të vrarë 44-vjeçarin Vangjelis Zabunis, një ndër eksponentët më të rëndësishëm të mafias greke.
Hetimet e deritanishme flasin për një larje hesapesh mes grupeve kriminale greke që kanë lidhje me kontrabandën e karburanteve.
Pavarësisht se më parë ai u kishte shpëtuar dy atentateve të tjera, 44-vjeçari në mënyrë të pashpjegueshme për hetuesit grek, ditën e ekzekutimit nuk kishte shoqërues të armatosur.
Ngjarja ndodhi mëngjesin e së dielës në rrugën “Ilia Iliu” në Athinë dhe siç shihet në pamjet e atentatit të publikuara nga mediat greke, 44-vjeçari i veshur sportiv hipën në makinën e tij, një BMW e blinduar dhe vetëm pak sekonda më pas aty afrohet një makinë tjetër tip Leksus, e vjedhur në Milano.
Prej saj dalin dy persona të maskuar dhe të veshur me të zeza, njëri prej të cilëve afrohet në xhamin në krahun e shoferit dhe nis të qëllojë me kallashnikov deri sa i mbaron karikatori.
Por nuk përfundon me kaq, ai vendos një karikator të ri dhe nis të qëllojë sërish mbi xhamin e blinduar të shoferit.
Pas tij në lojë hynë edhe autori tjetër, i cili nis të qëllojë në krahun tjetër të makinës, teksa Zabunis tashmë duket se kishte vdekur.
Por për t’u siguruar për këtë vrasësi që vepronte nga ana e shoferit nxjerr një pistoletë nga brezi dhe hap derën e makinës dhe e qëllon disa herë në kokë 44-vjeçarin.
Automjeti i autorëve u gjet pak orë më vonë i djegur në periferi të Athinës, ndërsa brenda saj policia gjeti edhe 2 kallashnikov dhe një pistoletë që besohet se janë përdorur në ngjarje.
Ndërkohë që viktimës me vete iu gjet një pistoletë tip Glok, ndërsa në bagazhin e makinës së tij policia gjeti edhe një kallashnikov.
