Një ngjarje e rëndë ka ndodhur në një shkollë të mesme në Filipine, ku dy nxënës kanë humbur jetën dhe disa të tjerë janë plagosur pas të shtënave të raportuara brenda institucionit arsimor.
Sipas informacioneve të publikuara, rasti ka ndodhur në Shkollën e Mesme Kombëtare Banga, në komunën Banga të provincës jugore të Mindanaos. Dy nxënësit që humbën jetën ishin 14-vjeçarë.
Autoritetet lokale kanë bërë të ditur se nga incidenti janë plagosur edhe nëntë persona të tjerë. Kryebashkiaku i Bangës, Albert Palencia, ka deklaruar se gjendja e katër prej të plagosurve është kritike.
Sipas të dhënave paraprake të autoriteteve, i dyshuari ishte një 16-vjeçar. Hetuesit po punojnë për të sqaruar motivin dhe rrethanat që çuan deri te ngjarja.
Palencia ka treguar se një ditë më herët 16-vjeçari u kishte thënë disa miqve të tij që pas drekës të largoheshin nga shkolla dhe të shkonin në shtëpi. Sipas tij, miqtë nuk e kishin marrë seriozisht atë që u ishte thënë.
“Miqtë e tij qeshën sepse autori ishte një shakaxhi i njohur. Pas drekës, ai filloi të qëllonte studentët”, ka deklaruar kryebashkiaku, duke përshkruar informacionet e deritanishme për rastin.
Autoritetet raportuan se pas incidentit edhe 16-vjeçari është gjetur pa shenja jete. Hetimi pritet të përcaktojë të gjithë kronologjinë dhe rrethanat që i paraprinë ngjarjes.
Pas zhvillimeve në shkollë është marrë vendim për pezullimin e mësimit në të gjitha nivelet në komunën Banga, ndërsa institucionet janë mobilizuar për t’u ofruar mbështetje nxënësve, mësuesve dhe familjeve të prekura.
Departamenti i Arsimit i Filipineve është shprehur “thellësisht i shqetësuar” dhe ka bërë të ditur se është duke bashkëpunuar me autoritetet përgjegjëse për verifikimin e plotë të rastit.
“Prioriteti ynë i menjëhershëm është siguria dhe mirëqenia e nxënësve, mësuesve dhe personelit të shkollës”, thuhet në reagimin e Departamentit të Arsimit.
Institucioni u ka bërë thirrje qytetarëve që të mos shpërndajnë informacione të pakonfirmuara derisa autoritetet të përfundojnë hetimet.
