Viktimat janë Rosalia La Manna, 37 vjeçe, dhe djali i saj Vincenzo Troia, 21 vjeç. Sipas të dhënave të para, në hapësirën ku ndodheshin dy viktimat mungonte oksigjeni, ndërsa dyshohet se ishte krijuar një përqendrim i lartë i dioksidit të karbonit.
Sipas rindërtimit paraprak të ngjarjes, Vincenzo kishte zbritur në cisternë për të marrë disa rrjeta që familja përdorte për mbledhjen e ullinjve. Por 21-vjeçari dyshohet se është asfiksuar brenda pak minutash.
Pasi djali nuk po dilte dhe nuk po përgjigjej, nëna e tij zbriti për ta kërkuar dhe për t’i ardhur në ndihmë. Edhe ajo u ekspozua ndaj të njëjtave kushte dhe humbi jetën.
Zjarrfikësit e njësisë së specializuar NBC hynë në ambient me bombola oksigjeni për shkak të rrezikut të lartë. Kontrollet e para konstatuan se brenda hapësirës nuk kishte nivele të mjaftueshme oksigjeni për mbijetesë.
Rosalia La Manna ishte pronare e një biznesi bujqësor që merrej edhe me prodhimin e vajit të ullirit. Në cisternat nëntokësore familja mbante mjete bujqësore dhe rrjeta për vjeljen e ullinjve.
Sipas hipotezës së parë, rrjetat e lëna aty për një periudhë të gjatë, së bashku me mbetje bimore, mund të jenë dekompozuar duke favorizuar prodhimin e dioksidit të karbonit dhe duke e kthyer ambientin e mbyllur në një hapësirë pa oksigjen.
Trupat e nënës dhe djalit u nxorën nga ekipet e shpëtimit, ndërsa personeli mjekësor nuk mundi të bënte gjë tjetër veçse të konstatonte vdekjen e tyre.
Karabinierët kanë nisur hetimet për të përcaktuar me saktësi dinamikën dhe shkakun përfundimtar të tragjedisë.
