Në një pistë të improvizuar në autostradën E75 pranë Tikkakoski-t, Forcat Ajrore Finlandeze zhvilluan stërvitjen Baana 25, gjatë së cilës avionët luftarakë u ngritën dhe u ulën në një rrugë që normalisht pëdoret për lëvizjen e qytetarëve.
Stërvitja që zgjati tre ditë tregoi qartë angazhimin e Finlandës ndaj konceptit të operacioneve të shpërndara, një pjesë kyçe e strategjisë së NATO-s për shkathtësinë në luftë.
Në stërvitje morën pjesë avionë F/A-18 Hornet, të cilët formojnë shtyllën kurrizore të aviacionit luftarak finlandez (54 F/A-18C me një pilot dhe 7 F/A-18D me dy pilotë). Këta avionë luftarakë shumëfunksionalë përdoren si për qëllime luftimi ashtu edhe për qëllime stërvitore. Megjithatë, pritet që në vitin 2026 të fillojnë dërgesat e deri në 64 avionëve të rinj shumëfunksionalë F-35 Lightning II, të cilët do ta modernizojnë plotësisht flotën ajrore të Finlandës.
Stërvitja e këtij viti mori gjithashtu një dimension ndërkombëtar, pasi për herë të parë, morën pjesë avionë holandezë F-35A, duke konfirmuar më tej integrimin e thelluar të Finlandës në operacionet ajrore të NATO-s, pasi vendi u bë anëtar i Aleancës në vitin 2023.
Ulja në rrugë dhe përdorimi i pistave të improvizuara kanë qenë pjesë e strategjisë mbrojtëse finlandeze për shumë vite. Për shkak të përvojës së saj të pasur në kushte të tilla, Finlanda është bërë një shembull dhe partner për anëtarët e tjerë të NATO-s që vijnë për të praktikuar të njëjtat aftësi.
Vitin e kaluar, si pjesë e stërvitjes Baana 24, avionët amerikanë F-35 dhe Eurofighter Typhoon gjerman zbarkuan në rrugët finlandeze për herë të parë. Kjo mënyrë operimi i lejon Forcës Ajrore Finlandeze të mbetet e gatshme për luftime edhe nëse pistat ushtarake janë shkatërruar ose jashtë shërbimit.
Finlanda nuk është i vetmi vend që praktikon uljen e avionëve luftarakë në rrugë. Në shtator 2023, Zvicra kreu një ushtrim të ngjashëm në autostradën A1 midis Avenches dhe Payern, ku avionët e saj F/A-18 Hornet praktikuan ngritje dhe ulje nga vende të improvizuara.
Arsyeja është e thjeshtë – avionët luftarakë zviceranë janë të vendosur vetëm në tre baza ushtarake (Payerne, Meiringen dhe Emmen), gjë që i bën ato të prekshme nga sulmet e mundshme, veçanërisht raketat me rreze të gjatë veprimi.
Analistët ushtarakë paralajmërojnë se rreziku është shumë real, siç dëshmohet nga përvoja e luftës në Ukrainë, ku shumë aeroplanë u shkatërruan ndërsa qëndronin në pista.
Kjo është arsyeja pse vendet neutrale si Zvicra po zhvillojnë tani aftësi të shpejta për ribazim ajror, të ngjashme me atë që Finlanda ka bërë prej vitesh. Qëllimi është i qartë: të sigurohet funksionimi edhe kur aeroportet tradicionale nuk janë të disponueshme, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
