E shtuna kishte nisur qetë për E.S që kishte zgjedhur të udhëtonte nga Tirana drejt Durrësit për të kaluar pak kohë në qytetin bregdetar. Qetësinë e kësaj dite e pasoi paniku kur teksa ecte me 60 km/orë në korsinë e ngadalësimit të autostradës, shoferi para që tentoi të shmangte një gropë për pak doli nga rruga.
Skena të kësaj natyre që kërcënojnë sigurinë e përdoruesve për shkak të gjendjes së degraduar të rrugës përsëriten çdo ditë sa herë përshkruan këtë aks në të dy drejtimet.
Gropat nuk kanë fund dhe sa vijnë e shtohen. Fillimisht ato ishin më evidente në korsinë e ngadalësimit çka bëri që shumica e shoferëve të dynden tek korsia e shpejtësisë që tashmë edhe ajo është degraduar në të njëjtën pikë. Shpresat që mbi këtë rrugë do të vihej dorë me ndonjë arnë, siç e do tradita përpara zgjedhjeve dhe para nisjes së sezonit turistik, tashmë u shuan.
Së fundmi, vetëm në një pjesë të vogël në afërsi të Vorës janë bërë disa mbushje të gropave. Më shumë se një punë e planifikuar dhe që synon të rrisë sigurinë duket sikur qeverisë i teproi një dorë asfalt nga diku tjetër dhe vendosi mos ta çojë dëm.
Tiranë-Durrës është arteria kryesore rrugore në vend me fluksin më të madh të mjeteve që qarkullojnë në bazë ditore teksa ka gjithashtu lidhjen me Portin e Durrësit, më i madhi në vend por edhe me Aeroportin e Tiranës. Pavarësisht se kalimi në këtë rrugë është kthyer në stres të përditshëm për ata që e përdorin shpesh këtë duket se nisja e sezonit turistik do ta bëjë edhe më evidente problemin dhe kushtet e rrugës.
Operatorët turistikë thanë për “Monitor” se transporti i turistëve të organizuar që bëhet nga Aeroporti nëpër këtë autostradë me autobusë të mëdhenj është një nga ato “aventura” që të huajt nuk e vlerësojnë pozitivisht.
Një rrugë e amortizuar në këto nivele nuk flet mirë as për Shqipërinë në imazhin e përgjithshëm turistik të saj. Si pjesë e vlerësimeve të agjencive të huaja me klientët që sjellin në Shqipëri është edhe infrastruktura dhe kur janë bërë rrugë të shumta në vend, është për të ardhur keq që autostrada kryesore që çon turistët drejt Durrësit dhe Golemit është në këtë gjendje.
Qeveria ndërkohë po vijon me punimet për zgjerimin e autostradës, ku është avancuar me pjesën nga Kthesa e Kamzës deri tek Kthesa e Rinasit. Tenderat për pjesën tjetër deri në hyrje të Durrësit nuk janë hapur akoma. Kosto e përllogaritur e zgjerimit të gjithë rrugës Tiranë-Durrës, sipas dokumentit të politikave prioritare 2025-2027 është rreth 300 milionë euro për 31 km.
Do të ishte mirë që paralelisht me këto punime, që nuk dihet se kur do të mbarojnë, të mirëmbahej edhe pjesa tjetër që është bërë makth sidomos për ata që kalojnë çdo ditë, ku trafiku apo dëmi që pësojnë automjetet është dhimbja më e vogël e kokës dhe rreziku nga parametrat e munguar të sigurisë që duhet të ketë rruga është i madh./Monitor , do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
