Detaje të reja janë vdekja e këngëtarit grek Giorgos Mazonakis. Mësohet se këngëtari kishte shkuar pasditen e së mërkurës, në një njësi mjekësore në Kolonaki të Athinës, ku kishte planifikuar t’i nënshtrohej plazmaferezës, sipas gazetës greke Proto Thema.
Mazonakis kishte zhvilluar një takim të parë një ditë më herët, ndërsa procedura ishte planifikuar për ditën pasuese. Gjatë përgatitjeve dhe pasi stafi i kishte vendosur një kateter venoz, këngëtari ndjeu dhimbje të forta në gjoks dhe pësoi arrest kardiak, sipas personave në klinikë.
Stafi nisi menjëherë reanimimin kardiopulmonar. Përpjekjet i vijuan ekipet e urgjencës EKAB dhe më pas mjekët e spitalit “Elpis”, por nuk arritën ta rikthenin në jetë.
Autoritetet greke po hetojnë tani si rrethanat e vdekjes, ashtu edhe kushtet në të cilat klinika ofronte trajtimet.
Mjekja: Unë ia sugjerova plazmaferezën
Në kuadër të hetimit, patologu që zotëron njësinë në Kolonaki dhe bashkëshortja e tij, gjithashtu mjeke, dhanë deklarime në polici dhe u larguan nga komisariati i Kypselit pak para mesnatës.
Sipas informacioneve të raportuara nga Proto Thema, mjekja u tha autoriteteve se ishte ajo që ia kishte sugjeruar Mazonakisit trajtimin me plazmaferezë.
Pronari i njësisë, nga ana tjetër, mohoi përfshirjen e tij në incident dhe deklaroi se bashkëshortja menaxhonte klinikën, kryente trajtimet dhe monitoronte pacientët.
Avokati i tij, Nikos Agapinos, tha se ekspertiza mjeko-ligjore do të jetë vendimtare për hetimin, pasi duhet të përcaktojë nëse ekziston ndonjë lidhje mes vdekjes së këngëtarit dhe procedurave mjekësore të kryera në njësi.
Prokuroria ka kërkuar mbledhjen e provave të tjera për rrethanat e ngjarjes dhe për procedurën e planifikuar.
Çfarë është plazmafereza?
Plazmafereza, ose shkëmbimi terapeutik i plazmës, është një procedurë mjekësore gjatë së cilës gjaku kalon në një pajisje që ndan plazmën nga qelizat e gjakut. Një pjesë e plazmës largohet, ndërsa qelizat rikthehen në organizëm së bashku me një lëng zëvendësues.
Procedura përdoret për sëmundje të caktuara hematologjike, neurologjike, nefrologjike dhe autoimune, veçanërisht kur duhet të reduktohen me shpejtësi antitrupa patologjikë ose substanca të tjera që qarkullojnë në gjak.
Sipas mjekëve të Klinikës Terapeutike të Universitetit Kombëtar dhe Kapodistrian të Athinës, Konstantinos Giannakas dhe Thanos Dimopoulos, qëllimi i procedurës është largimi i faktorëve patogjenë nga plazma dhe, në sëmundje të caktuara, zëvendësimi i faktorëve të nevojshëm përmes lëngut që përdoret gjatë trajtimit.
Plazmafereza kërkon pajisje të posaçme, akses të sigurt vaskular, personel të trajnuar dhe monitorim të vazhdueshëm të pacientit. Komplikimet e mundshme përfshijnë uljen e tensionit arterial, çrregullime të nivelit të kalciumit, reaksione alergjike, probleme të lidhura me kateterin dhe, më rrallë, aritmi, gjakderdhje ose infeksione.
Dyshime për licencën e klinikës
Një nga çështjet kryesore të hetimit lidhet me licencën e njësisë ku ndodhej Mazonakis.
Ministri grek i Shëndetësisë, Adonis Georgiadis, deklaroi se hapësira kishte licencë për një klinikë të zakonshme patologjie dhe jo për kryerjen e plazmaferezës. Sipas tij, një procedurë e tillë nuk lejohej të kryhej në bazë të licencës që dispononte njësia.
Georgiadis njoftoi gjithashtu se i kishte kërkuar presidentit të Shoqatës Mjekësore të Athinës të nisë kontrollin e kushteve të funksionimit të njësisë dhe të procedurave që i paraprinë arrestit kardiak të këngëtarit.
Hetuesit duhet të përcaktojnë gjithashtu nëse plazmafereza kishte nisur apo Mazonakis ndodhej ende në fazën përgatitore. Vetëm vendosja e një kateteri venoz nuk provon se shkëmbimi i plazmës kishte filluar.
Në këtë fazë, nuk është përcaktuar një lidhje shkakësore mes procedurave mjekësore dhe vdekjes së këngëtarit. Autoritetet presin të dhënat mjekësore dhe rezultatet e ekspertizës mjeko-ligjore për të përcaktuar shkakun e saktë të vdekjes dhe rrethanat e incidentit.
