"Mos dil më, se ke dhe gocë"/ Pedagogia Ilirjana Kucana kërcënohet pas pjesëmarrjes në protestë! (Foto)
Pedagogia Ilirjana Kucana ka denoncuar publikisht se është kërcënuar për shkak të aktivizimit
të saj në protestën studentore, ku ka dalë në krah të studentëve të saj
për të protestuar para Ministrisë së Arsimit.
Përmes një reagimi publik, Kucana ka bërë të ditur se,
pasi është nisur së bashku me studentët drejt protestës, ka marrë një mesazh kërcënues në telefon.
Sipas saj, në SMS ishte dërguar fotografia e saj dhe i ishte kujtuar vajza, duke e konsideruar këtë një kërcënim që prek edhe familjen e saj.
Pas ngjarjes, pedagogia ka deklaruar se i është drejtuar organeve përkatëse me kallëzim dhe pret zbardhjen e plotë të rrethanave, si dhe identifikimin e personave përgjegjës.
“Unë nuk viktimizohem dhe as nuk kam frikë!”, shprehet Kucana, duke theksuar se do të vijojë të jetë pranë studentëve të saj në mbrojtje të të drejtave dhe kërkesave të tyre.
Ajo u ka bërë thirrje qytetarëve që të mos heshtin, t’i bëjnë publike rastet e kërcënimeve dhe t’u drejtohen institucioneve përkatëse.
Reagimi i Ilirjana Kucanas:
KËRCËNIME FAMILJARE PËR SHKAK TË AKTIVIZIMIT TIM NË PROTESTËN STUDENTORE!
Për shkak të aktivizimit tim gjatë këtyre ditëve në protestën studentore, si pedagoge, jam kërcënuar familjarisht.
Pasi kam dalë me studentët e mi nga fakulteti drejt protestës para Ministrisë së Arsimit, kam marrë një SMS kërcënues, ku më është dërguar fotografia ime dhe më është kujtuar vajza. Më pas jam drejtuar organeve me kallëzim dhe pres zbardhjen e plotë të ngjarjes dhe identifikimin e personave që fshihen pas saj. Unë nuk viktimizohem dhe as nuk kam frikë!
Do të jem çdo ditë me studentët e mi, në mbrojtje të tyre, si nënë dhe si pedagoge. Kam qenë dhe do të jem gjithmonë në krah të rinisë, sepse besoj se arsimi dinjitoz, liria dhe e ardhmja europiane e Shqipërisë mbrohen duke qëndruar bashkë. E bëj publike këtë ngjarje edhe sepse e di që mund të ketë shumë studentë, pedagogë dhe qytetarë që kanë marrë kërcënime, por kanë zgjedhur të heshtin nga frika. Mos kini frikë!
Bëjini publike kërcënimet dhe drejtojuni organeve përkatëse. Heshtja nuk duhet t’u japë forcë atyre që kërkojnë të na frikësojnë. Asnjë kërcënim ndaj meje apo familjes sime nuk do të më largojë nga studentët. Nuk mund të kërkosh të ardhme europiane për Shqipërinë dhe të heshtësh përballë frikësimit të të rinjve dhe atyre që i mbështesin.
Ju e ndjeni fundin tuaj, por kërcënimet nuk do t’ju shpëtojnë! Do të jemi bashkë, në mbrojtje të njëri-tjetrit, të studentëve dhe të së ardhmes së vendit tonë. ASGJË NUK E NDAL KËTË REVOLUCION STUDENTOR! ma bej lajm kete tekst
