Një ngjarje e rëndë ka ndodhur në zonën e Cilentos, në jug të Italisë, ku një 25-vjeçar shqiptar ka humbur jetën pasi u qëllua me armë zjarri gjatë një tentative të dyshuar grabitjeje në një vilë private.
Viktima është identifikuar si Rivaldo Rusi, ndërsa autoritetet italiane kanë bërë të ditur se pronari i banesës, Aurelio Valiante, 58 vjeç, ka pranuar se ka qëlluar me armë ndaj personave që dyshohet se kishin hyrë në pronën e tij.
Sipas raportimeve të mediave italiane, ngjarja ka ndodhur gjatë natës mes të dielës dhe të hënës, kur disa persona dyshohet se tentuan të hynin në vilën e biznesmenit italian me qëllim grabitjen.
Si pasojë e të shtënave, Rivaldo Rusi humbi jetën në vendngjarje, ndërsa një person tjetër që ndodhej me të mbeti i plagosur. Ai u transportua për trajtim në një spital në Napoli, ku, sipas raportimeve, ndodhet në gjendje të rëndë.
Pas incidentit, autoritetet italiane ndërmorën veprimet hetimore dhe morën në pyetje pronarin e vilës. Sipas mediave lokale, Aurelio Valiante ka pranuar para hetuesve se ka përdorur armën gjatë ngjarjes.
Policia dhe Prokuroria italiane kanë nisur hetimet për të zbardhur plotësisht rrethanat e incidentit, përfshirë mënyrën se si ndodhi përplasja, numrin e personave të përfshirë dhe nëse përdorimi i armës ishte në përputhje me legjislacionin italian për vetëmbrojtjen.
Autoritetet pritet të analizojnë provat e mbledhura në vendngjarje, dëshmitë e personave të përfshirë dhe rezultatet e ekspertizave për të përcaktuar përgjegjësitë ligjore.
Hetimet për rastin janë ende në zhvillim dhe autoritetet italiane nuk kanë dhënë ende një qëndrim përfundimtar mbi rrethanat e ngjarjes, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE
