Balla mbron Ballukun dhe flet për Veliajn: Kam marrë ankesa edhe për Ilir Metën

do të vijojë agjendën e integrimit europian pavarësisht tensioneve në Kuvend.

Duke iu përgjigjur interesimit për kushtet e paraburgimit të kryebashkiakut të Tiranës, Balla theksoi nevojën për respektimin e të drejtave të personave të paraburgosur dhe të dënuar. Ai bëri të ditur se kishte marrë ankesa edhe për ish-presidentin Ilir Meta dhe se ua kishte përcjellë ministrave përgjegjës.

Sipas Ballës, çështjet që lidhen me trajtimin e të paraburgosurve dhe të burgosurve duhet të adresohen edhe në kuadër të procesit të anëtarësimit të Shqipërisë në Bashkimin Europian.

Reagimi i tij vjen pasi Veliaj dhe përfaqësuesit e tij ligjorë kundërshtuan transferimin në Fier. Kryebashkiaku ka pretenduar se është vendosur në izolim dhe se i është kufizuar komunikimi me familjarët dhe avokatët, duke kërkuar verifikimin e kushteve nga institucionet përgjegjëse.

Në të njëjtën dalje për mediat, Balla i doli në mbrojtje ish-zëvendëskryeministres Belinda Balluku, duke e vlerësuar për praninë dhe angazhimin në zonën zgjedhore.

“Sa i përket prezencës në zonën zgjedhore, është ndër deputetet më të mira të PS-së”, u shpreh ai, duke ftuar gazetarët të ndiqnin një aktivitet në Fier.

Deklarata për Ballukun vjen në kontekstin e kërkesës së mëparshme të SPAK-ut për arrestimin e saj në lidhje me akuza për korrupsion, kërkesë që u rrëzua nga Kuvendi.

Sa u përket zhvillimeve në seancë, Balla tha se ishin miratuar nëntë ligje të lidhura me agjendën e negociatave, një prej të cilave kërkonte shumicë të cilësuar. Ai deklaroi se bilbilat, flakadanët dhe zhurma nuk do ta ndërpresin këtë proces.

Balla njoftoi gjithashtu miratimin e kalendarit për shqyrtimin e buxhetit, të cilin e cilësoi me karakter social. Duke folur për paketën fiskale, ai përmendi uljen e TVSH-së për ushqimet në nivelin 6 për qind dhe heqjen e taksës së qarkullimit nga karburanti, si dhe i bëri thirrje opozitës të mbështesë masat për pensionet.

Në fund, kreu i grupit socialist theksoi se 82 deputetët e PS-së kanë përgjegjësi për të qenë të pranishëm në votime dhe për të përmbushur angazhimet ndaj qytetarëve.